LAOAG CITY – Inlawlawag dagiti sumagmamano nga estudyante iti Divine Word College of Laoag a saan a pudno ti alegasyon a mapilit dagitoy a gumatang ti uniporme para iti Intramurals a naiyuswat iti Marso 15 agingga iti Marso 17.
Daytoy ket kalpasan nga adda ti naawat ti Bombo Radyo Laoag a reklamo a maipagarop a piliten ti Student Council ken Faculty Members iti nadakamat a pagadalan dagiti estudyante a gumatang ti uniporme nga agbalor ti 400 a pisos ken no saan da a mangala ken rumrumuar nga agmulta da ti 300.
Malaksid iti daytoy, mairekreklamo pay ti maipagarop a panagmulta ti 200 a pisos kadagiti saan nga agatendar.
Nupay kasta, iti panagturong ti news team ti Bombo Radyo Laoag iti nadakamat a pagadalan, inbatad dagiti estudyante a ti uniporme ket agbalor ti 380 a pisos ken saan a mandatory a mangala dagitoy.
Malaksid iti daytoy, inpetteng pay dagiti estudyante a saan a pudno nga adda ti multa no saan da a gumatang ti uniporme.
Innbatad pay dagitoy a makaruar da latta iti auditorium ti unibersidad idi manarimaan ti Intrams da kontra iti reklamo nga ibati da ti ID da ken sakaen danto daytoy.
Mainaig iti daytoy, nagkedked ti presidente ti Student Council nga agkomento seknan iti nasao nga alegasyon ken ti laengen adviser da ti agsarita.
Kabayatanna, ikarkarigatan met ti Bombo Radyo Laoag nga alaan ti komento ti adviser ti Student Council iti nasao a pagadalan.
