LAOAG CITY – Ibilang ti Department of Migrant Workers a dakkel a tulong para kadagiti agkalikagum nga agtrabaho iti ballasiw taaw ti isaysayangkatda nga Overseas Job Fair.
Segun ken ni Mr. Christian Rey Sison, Regional Director ti Deparment of Migrant Workers – Region I, kalikagumda a saan laeng a ti trabaho ti maipaay kadagiti maseknan nga Overseas Filipino Workers no di ket pakairamanan ti skills training.
Inbatadna nga arig awan sardeng dagiti klienteda nga agturturong iti opisinada tapno agpatulong kas kadagiti Overseas Filipino Workers a repatriated, dagiti saan a napagasatan ti nasingpet nga employer ken dadduma pay.
Kunana a dagitoy ket naipaayan ti livelihood ken medical assistance pakairamanan ti counseling services.
Innayonna a babaen iti daytoy a programa ket matulungan dagiti maibilang a baro a bannuar ti pagilian.
