LAOAG CITY – Nagballaag ti Department of Energy (DOE) kadagiti amin a kompania ti langis ken dagiti gasolinaan a naiget a suroten ti naikeddeng a presio.
Daytoy ket kalpasan ti sumagmamano a report nga adda dagiti gasolinaan a nangipangato ti presio ti petrolyo a nasapsapa iti umiso nga schedule ti price adjustment.
Basar iti Department of Energy, nasken nga agay-ayam laeng iti P49 agingga iti sumurok P76 ti presio ti kada litro ti gasolina depende iti klase, P49 agingga iti sumurok P66 ti presio ti kada litro iti diesel manipud idi Marso 6 agingga inton bigat, Marso 9 ken iti kerosene, sumurok P78 agingga iti sumurok P99 ti nasken laeng a presio ti kada litro.
Inallukoy ni Energy Secretary Sharon Garin ti publiko a tumulong nga ag-report kadagiti mananggundaway a gasolinaan nangruna ket nasken nga awan ti agipangato iti petrolyo agingga inton Martes.
Kabayatanna, nagpalagip ti Energy Department kontra iti hoarding ken iligal a panaglako ti petrolyo a maysa a panaglabsing iti linteg ken mabalin a sumango iti pannusa wenno pannakakanselar ti permit.
Iti agdama, naipaigetan ti monitoring kadagiti gasolinaan kabinnulig ti Department of the Interior and Local Government ken Philippine National Police maiyallubog iti pammilin ni Presidente Ferdinand Marcos Jr.
