LAOAG CITY – Inpalagip ti Department of Health-7 iti publiko dagiti sakit a mabalin a maala nangruna no panawen ti panagtutudo, pakairamanan dagiti water-borne disease, influenza-like illness, leptospirosis, ken dengue.
Segun ken ni Regional Epidemiologist Dr. Eugenia Mercedes Cañal, agdagup iti 47 a kaso ti leptospirosis ti nairekord iti nadakamat a rehion manipud Enero agingga iti Hunio 15 ita a tawen.
Mainaig iti daytoy, ti kaaduan a kaso ket nairekord idiay Bohol nga addaan iti 19; sinaruno ti probinsia ti Cebu nga addaan iti 9; Siudad ti Cebu nga addaan iti 7; 5 idiay Negros Oriental; ken maysa a kaso ti tunggal maysa idiay Mandaue ken Lapu-lapu.
Nairekord ti departamento ti uppat a pimmusay gapu iti nasao a sakit, dua kadagitoy ket taga-Cebu City, ken saggaysa manipud iti Mandaue City ken Daanbantayan.
Inlawlawag pay ni Dr. Cañal a ti leptospirosis ket mabalin a magun-od ti maysa a tao babaen ti kontaminado a danum nga addaan iti bakteria nga awiten saan laeng a dagiti rata no di pay ket dagiti dadduma a taraken nga animal.
Kabayatanna, binalakadanda ti publiko nga agtalinaed a nasalun-at ken liklikan ti mapan iti danum ti layus gapu ta ad-adu ti dadaelna iti salun-at.
