LAOAG CITY – Kinumpirmaran ni Department of Health Certified Counselor ken Presidente ti Philippine Nurses Association – Ilocos Norte Chapter a ni Mr. Jurgen Rushell Rapacon a bumabbaba ti tawen dagiti biktima ti Human Immunodeficiency Virus wenno HIV ditoy pagilian.
Segun kenkuana, basar iti kaudian a nairuar nga Statistics idi bulan ti Hulio ket umaboten ti 1,111 dagiti kaso ti HIV iti intero a pagilian iti uneg laeng ti maysa a bulan.
Inbatad ni Rapacon a nasurok-kumurang a 38 a kaso ti HIV tunggal aldaw rason a maalarma iti bilang ti kaso ti HIV.
Inpakaammona a basar iti Statistics ti Ilocos Norte ket addaan 3 a porsiento ti kabuklan a bilang dagiti addaan ti HIV iti intero a Pilipinas ti kaalistoan iti panagngato ti kaso ti nasao sakit.
Gapu iti daytoy, ginutigot na ti amin nga agpa-test ken kitaen ti status nangruna ket itay napan a lawas ket adda manen ti baro a pasiente a na-diagnosed ti HIV.
Naamoan a ti ospital iti ciudad ti Batac ti kaasitgan a Treatment Hub kadagiti pasyente a positibo iti nasao a sakit a maaw-awagan ti Person’s Leaving with HIV.
Inlawlawag ni Rapacon a basar iti pagalagadan ti DOH, no reactive iti Screening Test ket ikabil da iti Treatment Hub para iti Baseline Test ken ipatulod da ti dara iti San Lazaro Hospital para iti Confirmatory Testing ken maiyuray ti resulta iti uneg ti dua agingga uppat a lawas.
Inpagunamgunam na a maala ti sakit nga HIV babaen ti unprotected penetrative sex with HIV infected person; mother to child transmission ken infected blood.
Innayon na pay a maliklikan dagitoy babaen ti panangsurot ti acronym nga ABCDE nga Abstain, Be mutually faithful, Consistent and Correct use of condom, Do not abuse alcohol and Do not use drugs ken Educate yourself.
Naammoan a ti tawen dagiti biktima ti HIV ket bimmaban iti tawen a 15-17.
Mainaig iti daytoy, inpakaammo ti Provincial Health Officer Dr. Josephine Ruedas a sipod idi tawen 1984 agingga Hunyo ita a tawen ket umaboten ti 147 ti kaso ti sakit nga HIV ditoy Ilocos Norte.
Inlawlawag na a sipod idi Enero agingga Hunyo ita a tawen 2019 ket adda ti 15 a positibo ti sakit nga HIV ditoy probinsia a kaadduan ditoy ket lallaki nga agtawen ti 24 agingga 34 ken adda pay dagiti agtawen ti 15 agingga 23.
Gapu iti daytoy mangisaysayangkat ti Provincial Health Office ti nagduduma nga aktibidad kadagiti pagadalan tapno ipaadal kadakuada ti HIV ken AIDS kas paset ti World AIDS Day.
