LAOAG CITY – Agtultuloy nga iberberipikar ti Department of Health ti damag maipanggep kadagiti innem nga indibidual ti natay gapu kadagiti heat-related illnesses gubuay iti kinabara ti panawen a mapaspasaran ita ditoy pagilian.
Segun ken ni Department of Health Secretary Teodoro Herbosa, mangiwaywayatdan ti imbestigasion tapno maammoan no ti kinapudot ti paniempo ti nakatayan dagiti maseknan nga indibidual.
Basar iti Event-Based Surveillance and Response System ti Department of Health idi Abril 22, nakairekordan ti 34 a kaso ti heat-related illnesses manipod idi Enero 1 agingga Abril 8, 2024.
Iti nasao a bilang, innem ti naipadamag a pimmusay.
Mamati ni Herbosa a posible nga ad-adu pay nga indibidual ti naapektaran ti heat-related illnesses ngem saan laeng a maimalmaldit dagitoy.
Inlawlawag ti sekretario a masansan a saan nga agturturong kadagiti ospital dagiti maseknan a pasiente a makapaspasar ti heat-related illnesses.
Kabayatanna, naiget a nagballaag ni Herbosa kadagiti umili nga agannad para iti salun-atda iti baet ti kinabara ti panawen.
