LAOAG CITY – Ginutigot ti Department of Health ti publiko nga aramiden dagiti addang tapno makaliklik iti sakit a dengue ita a dandanin panawen ti tudtudo.
Karaman kadagiti inrekomendar ti ahensya a rumbeng nga aramiden ket ti panangikkat kadagiti breeding sites ti lamok a carrier iti sakit a dengue.
Segun ken ni Health Secretary Teodoro Herbosa, nasaysayaat no matay a dagus dagiti lamok a possible a mangitunda iti dengue tapno awan dagiti mairisgo ti biagna.
Inpakaammo na a dagiti dadduma pay nga addang kontra iti dengue ket ti panagsuot ti nagagayad a kawes ken pantaloon a mabalin a mangbungon iti kudil, panagusar kadagiti mosquito-repellent lotion ken spray; agpakonsultar a dagus para iti aniaman a sintomas kas iti gurigor, sakit iti ulo, panagsakit iti karabukob ken susuop, panagbakwar, ken panaglitem ti bagbagi.
Ti dengue ket maysa a sakit nga itunda ti kagat dagiti lamok a mangitunda ti virus nga aedes aegypti a naipagagangay kadagiti tropikal a pagilian kas ti Pilipinas.
Basar iti datos ti Department of Health, addan ti 59,267 a dengue cases ti naireport sipud idi Enero 1 agingga iti Mayo 4 ita a tawen, karaman ditoy ti 164 a pimmusay.
