LAOAG CITY – Nagpalagip ti Department of Health (DOH) iti publiko nga awan ti napaneknekan nga epektibo a pangagas iti sakit a dengue.
Iti agtultuloy a panagngato ti kaso ti dengue ditoy pagilian, inabatad ni medical officer Dr. Kim Patrick Tejano, a dagiti virus ket narigat a maaddaan iti antivirals.
Kinuna ni Tejano nga adda dagiti agtultuloy a panagadal kadagiti posible a pangagas iti dengue, ngem awan ti maibilang nga epektibo.
Inpetteng ni Tejano ti ballaag ti Department of Health iti pannakaaramat dagiti alternatibo ken herbal a pangagas iti dengue kas iti tawa-tawa, siling labuyo, ken bayabas.
Segun iti ahensia, ti kasayaatan a wagas a pananglaban iti nasao a sakit ket ti panangliklik kadagiti lamok.
Isingasingna ti panagisuot kadagiti atiddog ti manggasna a kawes ken pantalon tapno maksayan ti pannakaisarang ti kudil ken panagusar kadagiti lotion ken spray a panglapped iti lamok.
Kabayatanna, gutgutigoten ti ahensia kadagiti Filipino ti nasapa nga agpakonsultar iti doktor no makariknada kadagiti sintoma a kas iti gurigor, sakit ti ulo, sakit ti susoup, panagulaw, wenno rashes.
Iti agdama, para ken ni Tejano, ti tulbek iti pananglapped ken panangkontrol iti dengue ket ti nasapa a pannaka-diagnose.
