LAOAG CITY – Inpetteng ti Philippine National Police (PNP) a ti naiget a panangipatungpal da ti curfew kadagiti menor de edad ket maysa a napateg nga addang tapno maiyadayo dagiti agtutubo iti impluwensya dagiti sindikato, kagiddan ti panangipasigurado da ti naiget a koordinasyon iti Department of Social Welfare and Development (DSWD) tapno saanen a maulit ti panagdudupudop kadagiti youth shelters.
Segun ken ni PNP Chief Police General Jose Melencio Nartatez, Jr., ti kangrunaan a gagem ti kampanya da iti babaen ti Safer Cities Initiative ket ti mangprotehir kadagiti agtutubo.
Nagballaag ti opisyal a ti masansan a gungundawayan dagiti kriminal ken sindikato ket dagiti menor de edad nga agwarang-warang iti kalsada tapno usaren iti nagduduma a klase ti kriminalidad.
Innayon na a tapno maalay-ayan ti panagamak ti publiko ken nagduduma a sektor, makikokoordinar tui nailian a pulisya iti Department of Social Welfare and Development kas panagsagsagana da iti manamnama a panagado dagiti marescue nga ubbing kadagiti isaysayangkat da a night-time operations.
Inaramid ti PNP ti nasao nga addang kalpasan a nangiparuk-at ti naiget a pannakaalarma ti Children’s Legal Rights and Development Center (CLRDC) mainaig iti possible a panagdudupudop kadagiti pasilidad iti Bahay Pag-asa no ginasut nga ubbing ti matiliw iti uneg laeng ti maysa a rabii.
