LAOAG CITY – Kiniddaw ni Department of Health (DOH) Undersecretary Emmie Liza Chiong iti House Committee on Health nga ikonsiderar ti mangaramid ti minor penalties para kadagiti nagannak nga agkedked wenno agliway a mangprotehir iti anak da manipod kadagiti sakit a mabalin a maprebentaran babaen ti panagpabakuna.
Inaramid daytoy Chiong kabayatan ti panagdengngeg ti House panel mainaig kadagiti gakat para iti mandatory immunization program, comprehensive maternal healthcare pakairamanan ti immunization, ken ti pannaka-institutionalize ti panangiyimplementar ti Immunization Agenda 2030, ken dadduma pay.
Inbatad ni Chiong a ti pagilian ket nagtalinaed nga high risk para iti vaccine-preventable diseases no sadinno a 60-70% laeng dagiti naan-anay a nabakunaan idi 2018 agingga iti 2022.
Mainaig iti daytoy, inrakurak met ni Department of Health Immunization Program Manager Carmina Vera, a dagiti naan-anay a nabakunaan nga ubbing idi 2025 ket 64.27 percent wenno agarop 1.5-million idinto a target ti gobierno ket 95 percent.
