LAOAG CITY – Inrakurak ti Department of Health (DOH) ti agtultuloy a panagngato ti bilang dagiti measles-rubella cases iti pagilian.
Naammoan a manipud idi Enero agingga iti Marso 1, ita a tawen ket addaan ti 922 a kaso ti nairekordda.
Daytoy ket 35 a porsiento a nangatngato maidasig iti kapada a bulan iti napalabas a tawen nga addaan laeng ti 683 a kaso.
Ibilang ti Department of Health a daytoy ket makapadanag kadagiti sumagmamano a rehion kas iti National Capital Region, Cordillera Adminstrative Region, Ilocos, Bicol, Western Visayas ken SOCCSKSARGEN.
Kaaduan kadagiti nakaptan ket dagiti ubbing a saan a nabakunaan wenno saan a kumpleto ti measles vaccination dagitoy.
Gapu iti daytoy, inabisoan ti Department of Health dagiti nagannak a makikoordinarda kadagiti health centers kadagiti bukudda a lugar.
