LAOAG CITY – Mangidonar ti Department of Health dagiti medical equipment iti Piddig District Hospital.
Segun ken ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte, daytoy ket kalpasan ti panagkiddaw ti probinsia iti Department of Health para iti pannakapapintas ken pannakapasayaat pay dagiti ospital tapno agbalin a Level 1 Hospital.
Inbatadna a daytoy ket maysa kadagiti addang ti probinsia tapno ad-adda pay nga agbalin a dekalidad ti pannakaipadanon ti serbisio medikal kadagiti umili.
Naammoan a dagiti nasao a medical equipment ket maysa nga unit ti ultrasound scanner nga agbalor ti 135 a milyon a pisos, maysa nga unit ti delivery room light nga agbalor ti 124 a milyon a pisos, maysa nga unit ti operating table nga agbalor ti 205 a ribu a pisos ken maysa a therapy machine
nga agbalor ti 78 a ribu a pisos.
Immuna iti daytoy, inaprobaran ti Sangguniang Panlalawigan ti maysa a resolusion a mangipalubos a makipagpinnirma iti Deed of Donation ti probinsia nga ibagian ni Gov. Matthew Marcos Manotoc ken ti Department of Health nga iriprisentar ti Department of Health – Region I Director Dr. Paula Sydiongco tapno pormal a maipatungpal daytoy.
