LAOAG CITY – Ginutigot ti Department of Health (DOH) dagiti biahero ken dagiti makipaset iti Visita Iglesia a siguradoen a kumpleto dagiti intugotda a proteksion ken suplay medikal tapno makaliklik iti aniaman a sakit ita a Semana Santa.
Iti baro nga abiso ti ahensia, naiget a binalakadan ti publiko nga agbalin a naridam iti posible nga epekto ti panagsisinnelsel ken sasaaden ti panawen.
Kangrunaan nga inrekomendar ti ahensia ti panangitugot ti umdas a mainum a danum tapno makaliklik iti dehydration kasta pay ti payong ken dagiti personal nga agas.
Malaksid iti daytoy, nagpalagip ti Department of Health kadagiti umili nga agbalon ti snacks, extra a bado ken pal-id wenno portable fan kas panglaban iti pangta ti nabara a panawen.
