LAOAG CITY – Naglikudan ti Department of Health (DOH) ti agwarwaras a damag iti maipatungpal a lockdown iti pagilian gapu iti maipagarup a COVID-19 variant a “Cicada.”
Immapela ti ahensia iti publiko a liklikan ti panagiwaras iti social media ti fake news ken ammoen dagiti umno nga impormasion iti official Facebook page ti Department of Health a mangian-anunsio kadagiti lehitimo a damag.
Immunan nga inpadamag ti Department of Health nga awan ti nairekord a Cicada infections iti pagilian.
Ti BA.3.2 Cicada strain ti COVID-19 ket naduktalan idi Nobiembre 2024 iti South Africa nga iti panangkumpirmar ti World Health Organization (WHO) ket agtultuloy nga imonmonitor kadagiti 23 a pagilian.
Inpasigurado ti Department of Health ti agtultuloy a serbisio ti Department of Health Hospitals ti publiko ita nga adda dagiti agraraira a sakit gapu iti panawen ti kalgaw.
