LAOAG CITY – Kageddan ti nagsasaruno a bagyo ditoy pagilian, naminsan manen a nagpalagip ti Department of Health iti publiko nga agdalus ken kumonsultar ti nasapa no adda ti sintomas ti dengue nangruna kadagiti rehion a naapektaran kadagiti bagyo ti Kristine, Leon, Marce, Nika, Ofel ken Pepito.
Basar iti Department of Health, mabalin a ngumato pay ti pagumokan ti lamok a mangitunda ti dengue.
Iti datos, makita a bumabbaba ti bilang dagiti kaso ti dengue. Adda ti 17,033 a kaso ti nairekord manipud idi Oktubre 20 agingga idi Nobiembre 2, 2024 a 17% a nababbaba maidasig iti 20,498 a kaso manipud idi Oktubre 6 agingga Oktubre 19, 2024.
Iti napalabas nga innem a bulan, awan ti nairekord a panagngato ti baro a kaso ti dengue kadagiti rehion, basar iti Department of Health.
Iti baet daytoy, agtultuloy ti panangukkon ti datos ken maikonsiderar nga adda ti nayon pay kadagiti sumarsaruno a lawas.
Kabayatanna, kitkitaen met dagiti datos a konektado kadagiti epekto ti bagyo a posible a saan pay a nairekord.
