LAOAG CITY – Nagpalagip ni Dr. Paula Paz Sydiongco, Regional Director ti Department of Heath – Region I mainaig iti dengue ita a panawen ti panagtutudo.
Segun kenkuana, masapul ti ad-adda a panagdaldalus iti panawen ti panagtutudo gapu ta adu dagiti mabalin a pagumukan wenno pagbalayan dagiti lamok nga adda ti itunda a sakit a dengue.
Inbatadna a kitaen dagiti banag nga adda iti uneg ken ruar iti pagtaengan a mabalin a pagitlogan dagiti lamok nga insigida nga ikkaten ti naurnong a danum kadagitoy tapno maliklikan a makaptan ti dengue.
Inlawlawagna a masapul nga insigida nga agpakonsultar iti doktor wenno agturong iti kaasitgan nga ospital tapno maammoan ti kasasad ti salun-at.
Innayonna ti kanayon a panangisayangkat ti 4 o’clock habit a naiget nga itantandudo ti Department of Health tapno maipasigurado nga awan ti aniaman a mabalin a pagbalayan dagiti lamok a mangitunda ti sakit a dengue.
