LAOAG CITY – Inrakurak ti Department of Health (DOH) a namonitor daytoy ti pakabuklan a 418 a road traffic incidents kageddan ti holiday season.
Naipadamag dagiti insidente iti kalsada iti walo a pilot sites iti babaen ti monitoring ti Department manipud idi Disiembre 22 agingga iti Disiembre 29.
Basar iti Department of Health, ti 418 nga insidente ita a tawen ket nangatngato ti 38% maidasig iti datos idi 2023.
Gapu iti daytoy, nagpalagip ti Health Department a liklikan nga agiturong no nabannog wenno nabartek tapno maliklikan ti aksidente.
Nasken nga agisuot dagiti motorista ken dagiti pasahero dagitoy ti helmets ken seatbelts. Obserbaran met ti speed limit ken road signs.
Nagballaag pay ti Department of Health kadagiti motorista, maaddaan ti pito agingga iti walo nga oras a turog ken liklikan ti panagusar ti mobile phones kabayatan ti panagbiahe.
