LAOAG CITY – Nakairekord ti Department of Health (DOH) ti agarup triple a panagngato kadagiti kaso ti hand, foot and mouth disease manipud idi Enero 2 agingga iti Pebrero 22 ita a tawen.
Basar iti datos ti ahensia, naaddaan ti pakabuklan a bilang a 7,598 ti kaso ti hand, foot and mouth disease kadagiti nasao a petsa. Daytoy ket tallo a daras a nangatngato manipud iti bilang a 2,665 a hand, foot and mouth disease cases iti napalabas a tawen iti kapada a timeline.
52% kadagitoy ket manipud kadagiti rehion ti Central Luzon, Mimaropa, National Capital Region (NCR) ken Cordillera Administrative Region (CAR).
Adda ti pakabuklan a bilang a 4,225 wenno katukad ti 56% met manipud ditoy ket dagiti ubbing nga agtawen ti uppat ken agpababa idinto a 2,069 dagiti agtawen ti lima agingga iti siam.
Naammoan nga uray saan a makapatay ti hand, foot and mouth disease, nagpalagip ti ahensia iti publiko nga alisto laeng nga agwaras iti nasao a sakit isu nga ugalien ti panagbuggo ti ima a nasken nga agpaot iti 20 a segundo usar ti sabon ken danom.
Liklikan dagiti indibidual nga addaan ti sintomas daytoy wenno positibo nga addaan ti hand, foot and mouth disease.
Nagballaag ti departamemnto nga insigida nga agpakonsultar no makarikna kadagiti sintomas kas ti gurigor, panaguyek, panateng, mouth sores, blisters iti ima wenno saka.
Kabayatanna, dagiti suspected wenno confirmed cases met ket naabisoan a saan a rummuar iti pagtaenganda wenno saan pay laeng a sumrek iti pagadalan wenno trabaho dagitoy.
