LAOAG CITY – Pagan-annaden ti Department of Health (DOH) ti publiko kontra kadagiti sakit a mabalin a mapasaran ita a simreken ti panawen ti kalgaw.
Iti abiso ti Department of Health, ngumatngato ti risgo ti heat exhaustion ken heat stroke, dagiti kondisyon a mabalin nga agbalin a nakaro ken makapatay no saan a maannadan ken malapdan.
Sumagmamano kadagiti sintomas ti heat stroke ket ti panaggurigor, panagul-ulaw, mapukawan ti poot, lumablabbaga a kudil ken makarikna ti sobra a kinabara ti bagi.
Binalakadan ti Department of Health ti publiko a suruten ti Heat Health Reminders tapno agbalin a natalged ken maliklikan ti aniaman asakit ita a panawen ti kalgaw.
Innayon ti ahensya a liklikan ti nadadagsen nga aramiden pisikal manipod alas-nuebe ti bigat agingga iti oras ti alas- 4 ti malem; uminom ti 7–8 a baso ti danom iti kada aldaw; agusar ti payong, paypay, wenno kallugong no rumuar ti balay ken agsuot ti napresko nga arwaten tapno nalag-an ti rikna.
