LAOAG CITY – Nagpanawagan ni Health Secretary Ted Herbosa kadagiti umili a saan a liplipatan ti mental health dagiti Pilipino a kangrunaan a naapektaran dagiti kalamidad ken didigra.
Kagidda iti daytoy, pinaigetan pay ti Department of Health (DOH) ti panangipatungpal na iti nagduduma nga addang a gagem na a matulungan dagiti umili a naapektaran ti gingined ken dadduma pay a trahedya.
Basar iti datos ti ahensya, umab-aboten iti 1,522 nga indibidwal manipod iti nagduduma a paset ti Cebu ti nakaawat ti Mental Health and Psychosocial Support (MHPSS), karaman dagiti dadduma pay a maiyannatop nga intervention.
Innayon ni Herbosa a nagsagana metten ti Department of Health ti maysa a komprehensibo a plano para iti panangipaay ti psychological first aid iti Davao Region ken kadagiti kaparanget a lugar a dinayyeg ti gingined idi biernes, Oktubre 10.
Segun ken ni Secretary Herbosa, dagitoy nga addang ket maiyataday iti direktiba ni Presidente Ferdinand R. Marcos Jr. a siguradwen a saan a mabaybay-an ti pagsayaatan dagiti umili a makarikrikna ti panagbuteng, nakaro a panagdanag wenno anxiety.
Inpasigurado met ti gobierno a maipaayan da ti naan-anay a pannakataripato dagiti residente nga agnanaed man dagitoy kadagiti tent city wenno nakasubli dan iti bukod da a pagtaengan.
