LAOAG CITY – Tutukan ti Department of Health (DOH) ti panangipaay ti primary health care kadagiti komunidad wenno purok level.
Daytoy ket babaen ti panangpapigsa pay ti PuroKalusugan program daytoy ken ti pannakairubuat ti BUCAS centers wenno Bagong Urgent Care and Ambulatory Service centers kadagiti lugar ditoy pagilian a saan a madanon ti serbisio.
Iti maysa nga event, inbatad ni Health Secretary Ted Herbosa nga ipayal-alisto ti Department of Health ti pannakaipatakder ti Bagong Urgent Care and Ambulatory Service centers iti pannakibinnuligda kadagiti pribado a sektor.
Inbatadna idi rinugian ti pannakaipasdek dagiti Bagong Urgent Care and Ambulatory Service centers iti napalabas a tawen.
Kunana nga adda ti 28 a Bagong Urgent Care and Ambulatory Service centers ti maipasdek a maserbian ti 28 a milyon a marigrigat a Pilipino inton 2028 ngem kalpasan ti siam a bulan, naipatakderen ti 46 a Bagong Urgent Care and Ambulatory Service centers iti intero a pagilian a Pilipinas.
Immunan a nairubuat ti umuna a BUCAS center idi Marso 6 a gagem a masolbar ti ambulatory medical ken surgical needs dagiti Pilipino.
