LAOAG CITY – Inrakurak ti Department of Justice nga awan ti kasiguradoan a malappedan ni dati nga Ako Bicol Party-list Representative Zaldy Co a makatalaw manipud iti pagilian a Czech Republic.
Daytoy ket kagiddan iti anunsio ni Presidente Ferdinand Marcos Jr. ti pannakatiliw iti nasao a dati nga agpanpanday linteg.
Inadmitir ni Justice Secretary Fredderick Vida nga adda ti posibilidad a nakaruaren iti Czech Republic ni Co.
Inlawlawagna a saanna a kayat ti mangipaay ti naan-anay a detalye gapu ta awan pay ti naberipikar nga impormasion a naawat wenno iggem ti ahensiada.
Kunana nga ad-adalenda ti legal nga addang tapno masigurado laeng ti lokasion ti pugante.
Inpettengna a makatulong ti ‘red notice’ manipud iti International Criminal Police Organization no bilang nakaruaren ti pagilian ni Co.
Naammoan nga awan pay ti inparuk-at wenno inyisyu ti nasao nga international organization a ‘red notice’ kontra iti pugante a ni Zaldy Co.
Iti agdama, manarimaan nga adda idiay Czech Republic ni Justice Sec. Vida a simmangpet idi kalman, Abril 24.
