LAOAG CITY – Inbasura ti Department of Justice dagiti reklamo kriminal nga inpila ni dati a Presidente Rodrigo Duterte kontra kadagiti nangangato nga opisial ti pulisia ken gobierno mainaig iti raid iti Kingdom of Jesus Christ compound idiay Davao City idi Hunio 2024.
Iti nairuar a resolusion, inbatad dagiti piskal nga awan ti umdas a pangibasaran wenno probable cause tapno ituloy ti kaso a malicious mischief ken violation of domicile.
Ti reklamo ni Duterte a naipila kas Kingdom of Jesus Christ administrator ket namunganay iti operasion ti pulisia idi Hunio 10 iti Glory Mountain Compound kabayatan nga adda ti maisaysayangkat a prayer meeting.
Dimmanon iti 400 nga armado a pulis ti simrek iti lugar tapno arestaren ni Pastor Apollo Quiboloy.
Inlawlawag ni Duterte a maikanniwas iti paglintegan ti inaramid a panagserrek dagiti pulis gapu ta arrest warrant laeng ti inpakitada ken awan ti search warrant-da.
Kunana nga adda pay ti maipagrup a kinaranggas, panangdangran kadagiti miembro ti simbaan ken pannakadadael kadagiti sanikua.
Naammoan a dagiti karaman nga inreklamo ni Duterte ket isuda dati a PNP chief Gen. Rommel Francisco Marbil, dati a DILG Secretary Benhur Abalos Jr., PNP Region XI Director Brig. Gen. Aligre Martinez ken PNP Director for Operations Maj. Gen. Ronald Lee.
