LAOAG CITY – Inlawlawag ni Department of Justice a saan a karaman iti opisyal a listaan dagiti nairekomendar a kasoan ti National Bureau of Investigation ni dati a House of Representatives Speaker Martin Romualdez.
Segun kenni Sec. Jesus Crispin ‘Boying’ Remulla, ti saan a panagparang ti testigo a ni Orly Regala Guteza iti panagkita da ti rason no apay a saan a nairaman ti kongresista.
Kunana a masapol pay laeng a maberipikar ken dumalan iti evaluation dagiti alegasyon da a pakairamanan ni dati a House Speaker Romualdez.
Malaksid kenni Romualdez, ni Mayor Nancy Binay iti Makati ket saan pay a nairaman iti listaan dagiti nairekomendar a makasoan.
Inlawlawag ni Remulla a manarimaan ti panangiproseso da ken panangtingiting da iti pannakairaman ti mayor.
Idi laeng kalman ket opisyal nga inparuk-at ti Department of Justice ti nagan dagiti mairekomendaran a mapilaan ti kaso.
Nupay awan ti nagan ni Cong. Romualdez, ummuna met iti listaan ni Ako Bicol Party-list Rep. Zaldy Co, dagiti senador nga isuda Chiz Escudero, Joel Villanueva, Jinggoy Estrada, dati a Senator Bong Revilla, ken dadduma pay.
Kabayatanna, inbatad ni Remulla a ti Witness Protection Program ket saan na a kayat a sawen a panangipaay laeng ti proteksyon.
Mainaig met iti rakurak ni Orly Guteza a saan na a kasapulan ti seguridad, inpetteng ni Sec. Remulla a sakop iti programa ti posible nga ibutakrak ti testigo.
Iti agdama ket agtultuloy ti imbestigasyon ti Department of Justice ken panangberipikar da kadagiti testimonya a nakalap da manipud kadagiti testigo.
