LAOAG CITY – Inpakaammo ni Ms. Shey Pia Abaya, Assistant Manager ti Public Employment Service Office ditoy siudad ti Laoag a kalikagum ti Department of Labor and Employment a mangestablisar ti Job Placement Office kadagiti amin a pagadalan.
Inbatadna a daytoy ket maysa a pangopisinaan a makatulong kadagiti estudiante a makasapul nga insigida ti pagtrabahoanda.
Inlawlawagna nga adda payen ti pannakipinnirmada iti Memorandum of Agreement iti Divine Word College tapno maaddaanda iti kastoy.
Malaksid iti daytoy, kunana a dati metten nga adda ti kastoy iti Mariano Marcos State University ken iti Northwestern University.
Innayonna a maysa daytoy a pammilin ni Presidente Ferdinand Marcos Jr. isut gapuna nga iti sibubukel a Public Employment Service Office iti rehion uno ket ar-aramidenna ti amin tapno maipaayan dagiti agtutubo ti napintas a masakbayanda.
