LAOAG CITY – Naisadsad ti maysa a dolphin iti kabaybayan iti Barangay Masintoc iti ili ti Paoay.
Segun ken ni Mr. Ramil Llanes, Team Leader for Responders ti Philippine Marine Mammal Stranding Network, nakita dagiti mangngalap iti nasao a barangay ti dolphin iti paset ti reef area nga adda ti kadakkelna a 1.93 meters ken agdagsen ti agarup 90 agingga iti 100 kilos.
Inbatadna a nagsagaba ti minor injuries ti dolphin a posible a naalana dagitoy iti pannakadangranna kadagiti batbato.
Inlawlawagna a basar iti datos ti Philippine Marine Mammal Stranding Network a naiyetnag ti red zone iti ili ti Currimao, Paoay ken Badoc gapu ta isu ti kaadoan ti kaso nga adda dagiti naisadsad a dolphin iti intero a pagilian a Pilipinas.
Kunana nga adda ti sumagmamano a rason no apay nga adda dagiti maisadsad a dolphin kas ti climate change, illegal fishing ken kinataeng ti maysa a dolphin.
Mainaig iti daytoy, kuna ni Mr. Llanes, inyuswatda ti umno a marine mammal rescue and rehabilitation protocols iti dolphin babaen ti Bureau of Fisheries and Aquatic Resources (BFAR), Mariano Marcos State University – College of Aquatic Sciences and Applied Technology (CASAT), Mariano Marcos State University – College of Veterinary Medicine, Philippine Coast Guard – Paoay Station, Provincial Government of Ilocos Norte, Local Government Unit iti ili ti Paoay, Office of the Rep. Angelo Marcos Barba ken Luntiang Asul Philippines.
Inpasingkedna a tinaripatoda a naimbag ti dolphin ken pinadasda pay a paruk-atan ngem saanna pay a kabaelan gapu ta agkakapsot daytoy.
Nupay kasta, inpakaammona a natay ti dolphin itay laeng bigat ita nga aldaw.
Innayonna a napanaganan ti nasao a dolphin ti “Marcu” gapu ta nakita daytoy iti bulan ti Marso.
