LAOAG CITY – Narisgo iti utek ti doomscrolling.
Daytoy ket kalpasan a nakita dagiti ebidensia dagiti siyentipiko iti insayangkatda a panagsukisok.
Iti kaudian a panagadal a naipablaak iti Journal of Computers in Human Behavior Reports, maysa a team ti researcher ti nakapaneknek nga adda ti koneksion iti nagbaetan ti doomscrolling ti rikna nga existential anxiety, despair, distrust ken suspicion base iti naisayangkat a survey kadagiti 800 nga estudiante kadagiti unibersidad.
Basar iti Flinders University researcher a ni Reza Shabahang, study lead author, ti pannaka-expose kadagiti negatibo a damag ket mabalin a pagtaudan ti “vicarious trauma,” rason a dagiti readers ken viewers ket makapasar ti secondhand trauma.
Naammoan a no ti maysa a tao ket na-expose iti negatibo a damag ken impormasion iti online, agbalbalin a pangta daytoy kadagiti pammati iti mortality ken kontrol iti bukod a biag.
Mapaspasamak ti doomscrolling no ti tao ket agkonkonsumo ti atiddog nga oras kadagiti negatibo wenno makapa-depress nga impormasion iti online.
