LAOAG CITY – Inpalawa ti Department of Science and Technology iti rehion uno babaen iti Provincial Science and Technology Center-Ilocos Norte wenno PSTC-IN ti panangipatungpalna iti Community Empowerment through Science and Technology wenno CEST program idiay ili ti Adams.
Paset daytoy iti gagemna a mangmantener iti ganuatna a manglaban iti kinakurapay ken mangitandudu iti kinaandor dagiti “marginalized communities” ditoy Ilocos Norte a karaman kadagiti kangrunaan a programa ti gobierno probinsial.
Segun ken ni Mr. Kent Ramil, information officer ti PSTC IN, nairubuat ti “Community Needs Assessment” wenno CAN idi Abril 12 iti ili ti Adams iti panangidaulo ni DOST-PSTC IN Provincial Director Engr. Benjamin S. Mercado, Jr. kaduana ti DOST-PSTC staff ken DOST 1 Regional CEST Coordinator a ni Mr. Decth-1180 Libunao ken dagiti kakaduana iti pannakibinnulig ti Mariano Marcos State University wenno MMSU.
Inbatadna nga inatendaran pay daytoy ni DOST 1 Regional Director, Dr. Armando Q. Ganal, a nangipatalged iti pannakapapigsa pay dagiti ganuat ti ahensia a mangpasayaat iti panagbiag dagiti mangbukbukel iti nasao a komunidad babaen iti pannakapasayaat dagiti lima a kangrunaan a benneg ti CEST Program iti nadakamat nga ili.
Inlawlawag ni Ramil nga umabot iti 25 dagiti nakipartisipar iti nasao nga aktibidad a pakairamanan dagiti lider dagiti asosasyon ken organisasyon iti barangay, principal kadagiti pagadalan, barangay health workers ken dagiti barangay officials pakairamanan ti local chief executive.
Mainaig iti daytoy, inpeksa ti mayor ti napalaus a panagyamanna iti oportunidad nga inpaay ti DOST 1 kadagiti kakailianna.
Kabayatanna, inbunannag ni Ramil nga inlawlawag ni Libunao ti kinapateg ti nasao nga aktibidad kas paset ti panagplano ken panangtingiting ti maiyannatup a maipaay a tulong.
