LAOAG CITY – Inbatad ni Department of Transportation Undersecretary Andy Ortega nga addan ti sumuruk-kumurang 83% dagiti pampubliko a lugan a nakapag-consolidate.
Nangrugi ti Public Utility Vehicle Modernization Program (PUVMP) idi 2017 tapno masukatan dagiti jeepney kadagiti behikulo nga addaan ti nababbaba nga Euro 4-compliant a makina tapno makissayan ti polusyon.
Gagem pay ti nasao a programa a sukatan dagiti unit a saanen a maibilang kas roadworthy.
Ti maysa a modern a jeepney unit ket agbalor ti nasurok a P2 milyon nga uray dagiti bangko a LandBank ken Development Bank of the Philippines ket ibagbaga da a nangina unay para kadagiti Public Utility Vehicle driver ken operator.
Immunan nga inrakurak ti Land Transportation Franchising and Regulatory Board a dagiti Public Utility Vehicle a saan a nakapag-consolidate kalpasan ti deadline idi Abril 30 ita a tawen ket maibilang a “colorum” wenno maysa a Public Utility Vehicle nga agpaspasada nga awan ti prangkisa na.
Kuna ni Land Transportation Franchising and Regulatory Board chairperson Atty. Teofilo Guadiz III a mabalin a tiliwen ti Land Transportation Office dagiti Public Utility Vehicle nga awan ti prangkisa na.
