LAOAG CITY – Inbilin ti Department of Transportation (DoTr) iti Land Transportation Office (LTO) a masuspenso ti panagkumpiskar iti driver’s license ti matiliw a motorista a naglabsing ti linteg trapiko.
Nabaliwan pay ti pagannurutan iti bilang ti aldaw no kaanu a rumbeng nga urnusen ti motorista ti kaso na.
Inbatad ni Transportation Secretary Giovanni Lopez a ti pammilin ket maiyataday iti direktiba ni Presidente Ferdinand Marcos Jr. a pagbalinen a simple ken nalawag dagiti wagas iti panagtiliw kadagiti aglabsing a motorista a makumkumpiskar ti lisensya da nga agmaneho.
Iti maysa a memorandum, inbilin ni Lopez ti temporaryo a pannakaisardeng ti panagkumpiskar ti lisensya ken marepaso amin nga adda ti pakainaigan ti pammilin tapno masigurado nga agpapada amin a pagannurutan.
Naamendaran pay ti pagannurutan iti panangurnus iti traffic apprehension cases, ken nasukatan ti pawayway manipod iti “15 calendar days” ket napagbalin a “15 working days” tapno maikkan ti umdas a panawen ti gobierno ken publiko a mangsolbar ti kaso.
Kayatna a sawen ket saan a karaman dagiti holiday ken long weekend iti bilang ti aldaw no ag-settle ti violation ti driver.
Inbatad ni Lopez a nupay saanen a makumpiskar dagiti lisensya dagiti driver nga aglabsing iti linteg trapiko, maikabil met iti alert status dagiti lisensya iti panagmaneho ti maseknan a driver.
