LAOAG CITY – Awan pay ti naawat ti DPWH 1st Engineering District a pammilin no maiserra manen ti bypass road a nalukatan bayat ti paskua ken baro a tawen.
Daytoy ti inbatad ni DPWH Assistant Engr. Richard Ragasa.
Segun kenni Ragasa, aggapo ti pammalin iti Regional Director ti DPWH wenno iti Regional Office.
Kuna ni Ragasa a mabalin met a ti laengen project engr. ti proyekto ti pangibilinan ti regional director no maparikepan manen ti bypass road kasta met ti bypass bridge.
Nupay kasta, kuna na a mapakaammoan da met laeng no adda ti kastoy a pammilin.
Maipalagip nga idi nalukatan ti nasao a bypass road ket naibaga met laeng a mairekep ita nga aldaw, Enero 3.
Kabayatanna, kunana nga awan pay ti naawat da a kumpirmasyon no kaano a maiyuswat ti pormal nga inagurasyon ti nasao a kalsada.
