LAOAG CITY – Aminado ni District Engineer Glen Miguel iti 1st Engineering District iti Department of Public Works and Highways ditoy ciudad ti Laoag nga umad-ado dagiti lugan a maiparparking iti agsinnumbangir a paset ti kalsada iti airport road.
Kunana nga adda ti nakita da a lote a maaramid a pagparkingan dagiti lugan ngem kasapulan paylaeng ti ado a proseso tapnu naan-anay a marugyan ti proyekto.
Naamoan nga adda ti nakasagana a 50 a milyon a pisos a pondo para ti pannakaestablisar ti building ken parkingan.
Mainaig iti daytoy, immapela ni Miguel iti naan-anay nga anus ken pannakaawat ti publiko iti agdama a sitwasyon iti nadakamat a lugar.
