LAOAG CITY – Naglikudan ni Engr. Ma. Venus Torio iti First Engineering District iti Dept. of Public Works and Highways (DPWH) ti alegasyon a maipagarop a saan a nga inpakammo iti lokal a gobierno ditoy ciudad ti Laoag a masemento ti Farm to Market Road iti Barangay Tangid ken Barangay Bengcag.
Segun kenni Torio, dua a bulan sakbay a nangrugi ti proyekto wenno iti rekord da ket adda ti surat da kenni Mayor Michael Marcos Keon a napetsaan ti Disyembre 11, 2020 ken in-release ti opisina na idi Disyembre 14, 2020.
Inpetteng na a naawat ti lokal a gobierno ditoy ciudad ti surat idi Enero 4, 2021 ken ti proyekto ket nangrugi idi Marso 3 ita met laeng a tawen.
Inlawlawag na a sakbay nga inyimplementar da ti proyekto ket adda ti inyuswat ti Dept. of Agriculture (DA) a validation ken koordinasyon iti lokal a gobierno ditoy ciudad.
Inbatad na a saan met nga agtignay wenno makastrek ti DPWH iti maysa a lugar no awan ti koordinasyon iti maseknan a kapitan.
Ummuna iti daytoy, iti impormasyon ti Bombo Radyo Laoag ket awan ti naawat ti Planning Department iti surat seknan iti nasao a proyekto.
