LAOAG CITY – Inlawlawag ni Assistant Engr. Angelito Dian, ti Department of Public Works and Highways First District Engineering Office no apay a Remove and Replace ti proyekto iti paset ti Juan Luna St. ditoy siudad ti Laoag.
Segun kenkuana, daytoy ket kalpasan ti panagpurpor iti nasao a kalsada ken naganat a nausar daytoy.
Gapu iti daytoy, inlawlawagna a saanen a ti gobierno ti mangibaklay ti magastos iti pannakatarimaan ken pannakapasayaat ti dalan no di ket ti kontraktor iti daytoy.
Mainaig iti daytoy, inbatad ni Engr. Dian a kinasarsaritana dagiti Project Engineer ken Project Inspector maipapan iti nasao a proyekto no sadino basar iti nagbalin a duktalda ket nasapa ti pannakalukat ti nadakamat a kalsada.
Innayonna a dumanon iti sumurok-kumurang a 200 square meters ti kalawa ti masuktan ken matarimaan a kalsada.
Immuna iti daytoy, rumrummuar iti obserbasion ti Department of Public Works and Highways First District Engineering Office nga alisto a naperdi ti kalsada iti Juan Luna St. ditoy siudad ti Laoag gapu iti nasapa a pannakausar ti kalsada nga imbes a 28 nga aldaw koma pay laeng ti mapalabas sakbay a mapalubusan a madalyasatan ti kalsada.
