LAOAG CITY – Nagpanawagan ni House Deputy Speaker ken Trade Union Congress of the Philippines Party-list Rep. Raymond Democrito Mendoza ken ni Presidente Ferdinand Marcos Jr. a sertipikaran kas urgent ti mailunglungalong a gakat para iti nayon a ₱200 iti inaldaw a sueldo dagiti mangmangged.
Apela daytoy ni Mendoza ken ni Presidente Marcos kalpasan a rimmuar iti survey ti Social Weather Stations (SWS) a 20.1% ti pamilia a Pilipino ti makapaspasar ti involuntary hunger wenno panagbisin.
Inbatadna a makapadanag a maysa iti kada lima a pamilia a Pilipino ti awan ti makanna idinto ti gobierno ket awan ti patinggana nga agdudua a mangipatungpal ti nayon a sueldo.
Nadismaya ni Mendoza a kabayatan a pagdedebatean ti trilyon a pisos nga utang ken panagtakaw ket agdebdebate met dagiti mangmangged no manganda kadi pay wenno agbasa pay ti annakda gapu ta barya laeng ti sueldoda.
Kiniddawna iti Presidente a tutukan ti nayon a sueldo sakbay a naan-anay a mabisinan dagiti umili ken sakbay a naan-anay a mapukaw ti talek dagiti umili iti gobierno.
Mangnamnama ni Mendoza a pilien ni Presidente Marcos a denggen dagiti mabisbisin a mangmangged nga imbes nga agtalinaed a balud kadagiti economic managers nga agserserbi a mangilablaban iti negosio kontra iti panagbisin ti pagilian.
