LAOAG CITY – Rinugianen a bunagen ti Department of Public Works and Highways ken Local Government Unit ti Pagudpud dagiti daga a naigabur kadagiti sumagmamano a kalsada iti Barangay Balaoi, Pancian ken Pasaleng iti nasao nga ili.
Segun kenni Police Staff Sergeant Nonoy Labrador iti PNP Pagudpud, adda dagiti kameng DPWH, LGU Pagudpud ken Municipal Disaster Risk Reduction and Management Council a nangbunag kadagiti daga iti tengnga ti kalsada usar ti loader rason a saan a nakalasat dagiti motorista ken dagiti tao a lumabas iti nasao a kalsada.
Inbatad na nga adda dagiti sumagmamano a kameng ti PNP Pagudpud kadagiti nasao a kalsada a naka-standby tapno mangipakaammo kadagiti residente ken motorista a saan pay laeng a mabalin a dumalyasat itay ummuna a gundaway.
Inlawlawag ni Labrador a manarimaan pay ti panagpukan da ti dakkel a kayo a natuang iti tengnga iti kalsada ti Brgy. Balaoi usar iti chainsaw ken dadduma pay nga equipments para iti al-alisto a pannakaikkat na.
Kabayatanna, kiniddaw ni Police Executive Master Sergeant Wenceslao Villaflor, Deputy Chief of Police ti Pagudpud dagiti agturong idiay Cagayan partikular iti Sta. Praxedes a saan pay laeng nga agtuloy gapu iti agtultuloy a mapaspasaran a tudo ken landslide ti nasao a probinsya ken para iti kinatalged da.
Agpapan maisursurat ti damag ket one lane pay laeng ti nasao a kalsada.
