LAOAG CITY – Inbutaktak ni Senate President Pro Tempore Panfilo “Ping” M. Lacson a saan a bumaba iti P50 bilyon manipud iti unprogrammed appropriations ti 2024 budget ti inlatang ti Department of Public Works and Highways (DPWH) para kadagiti proyekto imprastraktura pakairamanan ti P30 bilyon a naikabil kadagiti flood control projects laeng.
Inbatadna a nalawag daytoy a pammaneknek nga arig nasanayen dagiti sumagmamano nga opisial ti Department of Public Works and Highways a saan a sumurot iti master plan ti gobierno maipanggep iti pannakaipatungpal kadagiti proyekto.
Umannugot ni Lacson kadagiti reporma nga ipatpatungpal ita ni Department of Public Works and Highways Secretary Vince Dizon tapno maminsan manen nga ikorehir dagiti proyekto basar iti master plan ti gobierno pakairamanan dagiti pagalagadan ni Senate Finance Committee Chairman Sherwin Gatchalian a saan a pundoan dagiti proyekto a saan a karaman iti plano.
Inpetteng ni Lacson a masapul nga isardengen ti nakadawyan ti Department of Public Works and Highways iti panagay-ayam ti pundo ti gobierno nangruna iti panagsinnukat kadagiti proyekto a maibilang a technical malversation.
Kunana nga agbalin a natibker ti Senado iti panangikkat ti P42 bilyon a nailatang para kadagiti programa nga “ayuda” wenno social assistance manipud kadagiti unprogrammed appropriations ti 2026 budget bill ken pagtalinaeden laeng ti pundo para kadagiti foreign-assisted projects. Dinayaw met ni Lacson ni Gatchalian iti nasirib daytoy a panangidaulo kadagiti panagdengngeg ti komite iti pundo.
