LAOAG CITY – Inlawlawag ni Dr. Vicki Belo kadagiti nagkomento mainaig iti saan a pantay a barukongna ket gapu iti sinagabana a cancer idi 2016 no sadinno nga inikkat ti tumor iti akinkannigid a barukongna.
Inburayna a saan daytoy a resulta ti operasion iti klinikana no di ket iti panagpaagasna idiay New York.
Dinakamat ni Vicki nga inikkatan isuna ti tallo a lymph nodes isu nga adda ti pakalasinan nga arig bimmaba ti kilikilina.
Kiniddawna kadagiti netizens nga agbalin a nasingpet kadagiti ipapaayda a komento gapu ta isuna ket maysa a cancer survivor.
Kunana nga idi 2023, sinelebraran ni Vicki ti panagbalin a cancer-free ti agarup pito a tawen.
