LAOAG CITY – Inlawlawag ni Mr. Marvin Corpuz, driver ti bus nga addaan ti ruta a Laoag-Badoc a napan nakisarita iti Land Transportation Office (LTO) iti ciudad ti Batac mainaig iti napasamak nga insidente iti paset ti Barangay Pias Sur iti ili ti Currimao.
Ummuna iti daytoy, naala iti CCTV ti maysa a pasdek a dandani nadungpar ti bus ti SUV.
Basar ti CCTV, agpapaamyanan a direksyon ti bus ken sarsarunwen na dagiti dua nga SUV idi kellaat a nagturong iti akin-kannigid a linya ti kalsada ti maysa kadagiti SUV nga adda iti sango na.
Segun kenni Corpuz, saan na a napakadaan ti panag-left turn ti SUV ken uray agpreno ket madungpar na latta ti nasao a behikulo rason a nangkita ti wagas ken daytoy ket ti panangusar na ti shoulder ti kalsada ken inrikos na iti poste sakbay a nagsubli iti kalsada.
Kuna na nga inaramid na daytoy gapo ta saan na a kayat nga adda ti pasamak kadakuada kadagiti pasaheros na.
Inadmitir ni Curpoz a maysa kadagiti nagkurangan na ket ti saan na a pannakisarita kadagiti nakalugan iti SUV a dandani nadungpar gapo ta inkalikagom na a maidanon dagiti pasaheros na ditoy ciudad sakbay a napan kadagiti otoridad.
Naamoan a kalpasan daytoy ket naikkan ti ticket babaen ti LTO-Batac gapo iti reckless driving.
Mainaig iti daytoy, inlawlawag ni LTO Chief Judy Sabas iti ciudad ti Batac a nakadanon kenkuana ti nasao a pasamak kalpasan a nagreklamo ti maysa nga estudyante ngem ur-urayen da pay laeng ti sport report ti PNP-Currimao a pagbasaran da ken rekord da iti pasamak.
Kabayatanna, inpetteng ni Sabas nga ireport da daytoy iti LTFRB ken agdependar ti nasao nga ahensya no masuspenso wenno makaselar ti prangkisa ti operator ti bus.
Ikonkonsiderar met ni Sabas a maikkan ti perpetual ban ti driver a makaala ti lisensya ken agdependar no kasano ti panagannayas ti imbestigasyon iti kaso.
