LAOAG CITY – Nasugatan ti driver ti maysa a delivery van iti napasamak a desgrasya iti Barangay 1 ditoy ciudad ti Laoag.
Nabigbig daytoy a ni Jaymark Tabilla y Gaoiran, agtawen ti 24, addaan ti live-in partner, ken residente iti Barangay 57 Pila ditoy ciudad.
Iti imbestigasyon ti PNP, immuna a nadungpar ni Tabilla ti maysa a ford fiera ngem intarayan na ket ditoy a nadungpar na ti tent ti maysa a tianggi.
Nupay kasta, intultuloy na latta ti nagpataray a nakadungparan na manen ti maysa a ford everest a bagi ti maysa a dentista.
Gapu iti daytoy, nagsagaba ti sugat iti saka ni Tabilla ken naitaray iti Governor Roque Ablan Senior Memorial Hospital (GRASMH) ditoy ciudad para iti pannakaagas na ken pannakaeksamen na.
Iti pannaka-eksamen ni Tabilla ket positibo a nakainom ti nasanger.
