LAOAG CITY – Dead on arrival ti maysa a driver ti kurong-kurong kalpasan a nakadinnungpar na ti maysa a motorsiklo iti Airport Road iti paset ti Brgy. 47 Bengcag ditoy ciudad ti Laoag.
Nabigbig daytoy a ni Constantio Cajigal, 58, naasawaan ken residente iti Brgy. Zamboanga ditoy ciudad idinto a ti driver ti motorsiklo ket inturong ni Jesus Gagarin, agatwen ti 19, ken ti lubbon na a ni Charles Ian Domingo, 17 agpada a residente iti Brgy. 47 Bengcag ditoy ciudad.
Basar iti imbestigasyon, agpapalaud a direksyon ti kurong-kurong iti sangoanan ti Cabeza Elementary School idinto nga agpapadaya a direksyon ti motorsiklo.
Apaman nga agpakannigid a direksyon ti motorsiklo iti barangay road ket dita a nagdinnungpar da iti kurong-kurong.
Gapu iti daytoy, nagsagaba ti nakana a sugat iti nagduduma a paset ti bagi ni Cajigal kangrunaan iti ulo na a nangitunda ti pannakatay na.
Natukkol met iti akin-kannigid nga ima ken akin-kannawan a saka ni Gagarin idinto a nagsagaba iti gasgas ni Domingo.
Malaksid iti dayta, naisina iti sidecar ti kurong-kurong gapu iti napasamak a panagdinnungpar.
Naamoan a napaspas iti taray ti kurong-kurong.
