LAOAG CITY – Agpada a natay ti nangiturong ti motorsiklo ken ti kinalubbonna kalpasan ti panagdinnungparda iti maysa nga Isuzu Forward iti paset ti Manila North Road iti Barangay 3 San Ildefonso iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, dagiti biktima a nakalugan ti motorsiklo a Cyan Yamaha Mio I 125 ket agpada a residente iti ili ti Solsona ngem agtrabtrabahoda iti maysa a construction site iti ili ti Sarrat.
Inbatadna a ti nangiturong met ti Isuzu Forward ket agtawen ti 48, naasawaan ken residente ti Barangay Igsoro, Bugasing, Antique ken adda ti dua a dadduma pay a kaduana.
Inlawlawagna a basar iti inwayatda nga imbestigasion, kabayatan a dumaldalyasat ti Isuzu Forward nga agturong nga agpa-abagatan ket kellaat a nagdinnungparda iti motorsiklo nga agturong nga agpa-laud a nangitunda ti pannakaipurwak dagitoy sumagmamano a metro manipud iti nakapasamakan ti insidente.
Gapu iti daytoy, kunana nga agpada a nagsagaba ti nakana a sugat iti ulo ken bagi ti nangiturong ti motorsiklo ken ti kinalubbonna a naitaray iti Mariano Marcos Memorial Hospital and Medical Center iti siudad ti Batac ngem naideklara a pimmusay dagitoy kabayatan a matamtaming idinto a saan a naan-ano ti nangiturong ti Isuzu Forward ken dagiti kakaduana a nakalugan.
Naammoan a saan a nakasuot ti protective helmet ken high visibility vest dagiti dua a biktima idi napasamak ti desgrasia.
Innayonna a manamnama a maipila ti kaso a Reckless Imprudence Resulting to Multiple Homicide and Damage to Property kontra iti nangiturong ti Isuzu Forward.
