LAOAG CITY – Naticketan ken namulta ti 5 ribo a pisos ti driver ti private tricycle a nagbaliktad iti Bacarra Road bisinidad iti Barangay 13 ditoy ciudad ti Laoag.
Daytoy ket kalpasan a nakumpirmaran a nakainom ti nasanger kabayatan ti panagmaneho na.
Iti imbestigasyon ti Philippine National Police (PNP) ditoy ciudad ti Laoag, kabayatan ti panagpapa-amyanan ti tricycle a nagluganan dagiti aguliteg ket nadiskarkulo ti driver rason a naipaigid na a nagresulta ti pannakaidungpar na iti semento a sumrek iti maysa a pagtaengan.
Gapu iti daytoy, nagbaliktad ti tricycle kagiddan ti pannakasapgud na iti maysa nga estudyante a babai.
Nagasgasan ti saka ti estudyante idinto a dagiti aguliteg a nakalugan iti tricycle ket agpada a nagsagaba ti minor injuries.
Naamoan a dagiti aguliteg a nakalugan ti tricycle ket agpada a residente iti Brgy. 38, Sangil iti ili ti Bacarra.
Rumrumuar a naggapo dagitoy iti paggiinoman ken agawid da koman iti napasamak ti insidente.
Maibilang metten a nasolbar ti kaso gapu ta immanugot ti driver nga ibaklay na amin ti magastos iti pannakapaagas ti nasapgud na nga estudyante ken uray ti kadwa na.
