LAOAG CITY – Natay bayat a maag-agasan ti driver ti pick-up kalpasan ti panagdinnungpar da iti GMW Florida bus iti paset ti Barangay Dilavo iti ili ti Pasuquin.
Nabigbig ti biktima ken driver ti pick-up a ni Mr. Noel Modesto y Calivoso, Head Nurse, ken residente iti ili ti Bangui idinto a ti driver ti bus ket ni Louie Sardeng y Ramos, agtawen ti 51, naasawaan ken residente iti Barangay Tanggat Sur, Claveria, Cagayan.
Segun kenni Police Major Johnvale Maramag, ti hepe ti Philippine National Police iti ili ti Pasuquin, ti bus nga addaan ti plate number a NDP 8413 ket aggapo iti Tuguegarao City, Cagayan ken addaan ti 43 a pasaheros.
Iti inisyal nga imbestigasyon da, idi nakadanon iti kurbaan a paset ti kalsada ket immovertake ti pick-up iti maysa bagun a nagresulta iti panagdinnungpar da iti bus.
Gapo iti daytoy, nagsagaba ti nakana a sugat ti driver ti pick-up ken naitaray iti Gov. Roque Ablan Sr. Memorial Hospital ditoy ciudad ti Laoag ngem natay bayat a maag-agasan idinto a 13 kadagiti pasaheros ti bus ket naitaray iti Municipal Health Office iti ili ti Pasuquin.
Mainaig iti daytoy, inbatad na a basar iti palawag ti driver ti bus, bayat nga adayo pay ti pick-up ket immovertake ken nasdaaw gapo ta saan met laengen nga agsubli iti linya na agingga a napasamak ti desgrasya.
Inbatad met ti naka-tricycle kurong-kurong a ni Robert Cariño, residente iti Barangay Dilavo a sumarsaruno kenkuana ti bus, ngem idi nakita na a sumungsungad ti pick-up ket nagpaigid daytoy isu ti gapu na a ti bus ti nakadinnungpar ti pick-up.
Kabayatanna, pinasingkedan met ni Mr. Willy Florida, Consultant ti Florida Bus Company a tulongan da dagiti pasahero nga agdama a matamtaming iti balay pagagasan.
