LAOAG CITY – Kinumpirmaran ni Police Chief Master Sergeant Eric Bumagat, mangidadaulo ti Laoag City Police Station – Traffic Division a nabartek ken awan ti lisensiana ti driver ti SUV nga Honda CRV a nakadungpar kadagiti pito a barikada iti Gilbert Bridge iti Barangay 51-A Nangalisan ditoy siudad ti Laoag.
Segun kenkuana, ti nangiturong ti SUV ket maysa nga Overseas Filipino Worker nga agtawen ti 51, naasawaan ken residente ti Barangay 47 Bengcag ditoy siudad ti Laoag idinto a dagiti kaduana a nakalugan ket agtawen ti 48 ken 53 a residente ti Barangay Buttong ditoy siudad.
Inbatadna a naikkan ti citation ticket ti driver ti SUV gapu iti panaglabsingna kadagiti linteg trapiko.
Malaksid iti daytoy, inlawlawagna nga addan ti panagsarita ti nasao a driver ken ti lokal a gobierno ditoy siudad ti Laoag maipanggep iti panangbayadna kadagiti nadadael a barikada.
Maipalagip a kabayatan a dumaldayasat ti SUV nga agpa-abagatan ket maipagarup a napukawan ti kontrol ti manibela a nangitunda ti pannakaidungparna kadagiti barikada agingga a nagbaliktad pay daytoy.
Immuna iti daytoy, naitaray iti ospital dagiti dua a kadua ti driver ti SUV kalpasan a nagsagaba ti sugat iti nagduduma a paset ti bagida idinto a nagkedked a maitaray iti balay-pagagasan ti nadakamat a driver.
