LAOAG CITY – Mapilaan ti kaso ti maysa a drug surrenderee gapu iti panaglabsingna iti Republic Act No. 10591 wenno ti Illegal Possession of Firearms.
Daytoy ket kalpasan a maipagarup a nagpaputok daytoy ti paltog.
Nabigbig ti suspek a ni Valeriano Agliday y Gonzales wenno mas am-ammo iti naganna a Valli, agtawen iti 53.
Segun ken ni P/Capt. Ashley Cacayorin, Hepe ti Banna Municipal Police Station, agarup alas 9:10 idi rabii idi makaawatda ti tawag manipud iti maysa a concerned citizen a nangi-report iti panagpaputok ti paltog ni Agliday iti maysa nga store iti Brgy. Macayepyep iti ili ti Banna.
Basar iti inwayat nga imbestigasion dagiti otoridad, kabayatan nga adda ti suspek iti maysa a tiangge iti nasao a barangay ket inranta a dinungpar ni Rommel Garcia ti motorsiklona iti motorsiklo ni Agliday.
Gapu iti daytoy, maipagarup a nagpaputok ti paltog ni Agliday nga inpaturongna iti sementado a kalsada.
Nupay kasta, inagaw ni Dencio Barit, kadua ni Garcia ti paltog ti suspek ngem napaay daytoy isu a dagus a nagtaray isuna nga agpa-daya.
Mainaig iti daytoy, rumrummuar a nakita dagiti kameng ti Philippine National Police ni Agliday ken boluntario met a simmuko daytoy kadagiti otoridad.
Kabayatanna, naala manipud iti suspek ti maysa a calibre .45 nga addaan ti dua a bala ken awan ti maipakitana a lisensia ken dokumento daytoy.
