LAOAG CITY – Indeklaran ti PAGASA ti panangrugi ti dry season wenno ti nabara a panawen ditoy pagilian.
Daytoy ket gapu ta awanen ti angin amian wenno Northeast Monsoon a mangitunda ti nalamiis a paniempo ken nasuktanen ti easterly gapu iti High Pressure Area (HPA) iti amianan a laud iti Pasipiko.
Gapu iti daytoy, manamnama a mapasaran ti nabara a pul-oy ti angin kadagiti nagduduma a paset ti pagilian.
Inabisoan met ti PAGASA ti publiko a no awan ti aramiden ket liklikan a rummuar iti pagtaengan manipud iti oras ti alas dies ti bigat agingga iti alas kuatro ti malem tapno maliklikan iti aniaman a sakit a mabalin nga itunda ti sakit kas ti kudil, heat cramps ken heat stroke.
Kabayatanna, no rummuar iti pagtaengan ket agisuot ti presko a bado ken ugalien nga agitugot ti danum tapno maliklikan ti dehydration.
