LAOAG CITY – Naglikudan ni House Deputy Speaker Ronnie Puno nga isuna ti sumaruno nga Speaker ti kamara de representantes.
Daytoy ket maikontra iti sumagmamano nga agwarwaras nga impormasyon nga isuna ti ikonkonsiderar ti sumagmamano nga agpanpanday linteg a sumaruno nga agbalin a lider ti kamara de representantes.
Iti maysa nga interview, nasaludsud ken ni Puno maipanggep dagiti nasao nga impormasyon ken ti agtultuloy a pannakaiwaras dagitoy, aglalo iti kababaan a pagpandayan linteg iti kongreso.
Insungbat ni Puno a saanna nga ammo ti rason ti panagwaras ti impormasyon.
Inpasigurado na nga iti baet dagitoy ket agtultuloy latta ti panagtrabaho na kas mangibagi ti Antipolo.
Malaksid iti daytoy, inbatad pay ni Puno a kuntento dytoy kas chairman ti National Unity Party ken agtultuloy ti panangannong na iti daytoy iti tulong ti suporta dagiti pada na nga agpanpanday linteg.
Innayon ni Puno a saanen nga agar-arapaap ti nayun a trabaho ken kuntento iti agdama a posisyon na.
