LAOAG CITY – Pinalawa ti Department of Social Welfare and Development (DSWD) ti Supplementary Feeding Program (SFP) tapno ad-ado dagiti mabenepisyaran nga ubbing iti intero a pagilian.
Daytoy ket kagiddan ti nangatngato nga alokasyon ti budget tapno masuportaran ti nalawlawa a masakupan ti heograpiya ken nabaybayag a panawen ti panangpakan kadagiti ubbing mangrugi ita a 2026.
Basar iti Department of Social Welfare and Development, ti pannakaipalawa ti Supplementary Feeding Program ket mangiparangarang iti napapigsa a kari ti ahensya iti pannakapasayaat ti nutritional status dagiti ubbing nga agtawen ti dua agingga iti lima a nakarekord iti Child Development Centers (CDCs) ken Supervised Neighborhood Playgroups (SNPs), maiyataday iti Philippine Plan of Action for Nutrition (PPAN) ken Philippine Development Plan (PDP) 2023–2023–2023.
Inrakurak ti Department of Social Welfare and Development a ti pannakaipatungpal ti programa kadagiti naglabas a tawen ket nangipakita iti agtultuloy a panangngato dagiti rate ti balligi.
Inpakaammo ni Department of Social Welfare and Development Asst. Secretary Irene Dumlao, a ti panagngato ti alokasyon ti budget manipod iti nasurok a 5-bilyon a pisos agingga iti nasurok a P9.2-bilyon a pisos ket gagem na ti pannakaiyatiddog ti panawen ti panangpakan kadagiti ubbing manipod 120 nga aldaw agingga iti 180 nga aldaw ita a tawen.
Innayon na a ti nabaybayag a panangpakan kadagiti ubbing ket gagem na ti mangipaay ti agtultuloy nga interbensyon iti nutrisyon, mapasayaat dagiti resulta ti panagdakkel iti babaen ti nutrisyon.
