LAOAG CITY – Ginutigot ti Department of Social Welfare and Development (DSWD) dagiti benepisiario ti Pantawid Pamilyang Pilipino Program (4Ps) nga agaplikar iti water bill discounts nga isagsagot ti Maynilad Water Services, Inc.
Iti babaen ti Maynilad’s Expanded Enhanced Lifeline Program (Expanded ELP), dagiti kuwalipikado a kameng ti 4Ps nga agnanaed iti concessionaire’s service area iti West Zone ti Metro Manila ken Cavite ket makagun-od iti agingga iti 52.30 a porsiento a diskuento iti kangrunaan a singir iti bayadanda iti danum para iti konsumo da nga agingga iti 10 a metro kubiko.
Kabayatanna, adda diskuento nga agingga iti 46.25 a porsiento para iti pannakausar ti danum iti nagbaetan ti 11 ken 20 a metro kubiko, maibasar kadagiti rate nga epektibo manipud Enero 1, 2026.
Kuna ni 4Ps National Program Manager Director Gemma Gabuya, a gagem ti programa a pagbalinen nga ad-adda nga accessible ken madanon dagiti serbisio ti danum, partikular kadagiti pamilia a sumangsango kadagiti karit iti ekonomia, agraman dagiti benepisiario ti programa a 4Ps.
Inbalakad na a tapno magundawayan ti diskwento, kasapulan a punnuan dagiti benepisiario ti Expanded ELP application form ken isubmitir dagiti kasapulan a dokumento, pakairamanan ti kaudian a water bill ken 4Ps identification-da iti kaasitgan nga opisina ti Maynilad wenno Maynilad Barangay Helpdesk.
